nekada' ujung kayu naat langit 
Kerabang
Paro' SungaiBoka le nompak ngimet udip ji atek kado' ale' de ilu ngeno' teka'. Awak-awak nepe dalau jida re dau le. Dalau le ca iut ngan dalau ja ilu mudip ke daya songai ngan cu' ke alu'(pasen) atek co' ale'-ale' ne ketai usun tana' ji paliu.
Senganak, dalau me' iut senaa' tading tai me' ke tisen nto' tengen ke tuun, tai kua' padan ngan toya ait ke sada bai songai, atek mening tiring kise' layan songai Baliu ngan meka pe songai-songai da ca dalau ja. Ilu taan le kise' asat atuk(aley @ iyu-iyu naan atuk). Poto ale' le nyalam kise' atuk de ilu taan boka le ngalut dalau ja re. Nto' mesik mata le dalem songai pe ilu nta pelem. Boka naki? Mesik mata dalem songai bahaya ja senganak sokat pelem ngan sala'-sala' borau mata le.
Dalau taga' bileng le kise' kelebawai dalem songai. Alo songai sangkit mening boka songai tepao' bio' lepa ojan kasa. Ngan nape taga' naki odai alo songai tetap litut uko' kita milo re. Paro' naa ngan ait puti' ngan bue' tiga ale' teka naat da dalau ja re.Bue' ngan nta le nyigut te ilu sokat ken ke batu laey pa nyalit likut. Nta uko' kise' naki ne odai penu' lotek ngan batu naa pe tai jameng ale' kise'.
Dalau ja re kado' kata le tai pesalau kimet ngan tawai le. De sanget mesi ngan tai mita atuk ida beng todo ke naa tua'. Ngan dalau ja re kado' ale' atuk ngan pekenaan le de mudip dalem songai.Kado' pe baya' tain? Oba' ale du tai nyenang ngan paap ke naa de tiga. Selawan ale' kise' udip dalau ja re.
Un tepoo uko' baan dau du re side' atek ketai udip ji paliu lote ji. Kado' ale' de ilu ngeno' dalem udip ji ja ilu nta sokat ketai taan laa. Awak-awak nepe dalau udip jida re dau kimet iut lote.
