Anugerah Tuhan Yang Tidak Terkata....

Setiap detik...minit.....jam....hari...minggu...bulan..tahun....yang kita lalui merupakan satu anugerah yang tidak terkata. Tuhan sentiasa mengingatkan kita bahawa masa yang diberikan untuk kita adalah merupakan satu anugerah......Kita sendiri tidak boleh memendekkan atau memanjangkan masa yang diberikan oleh Tuhan....Kita juga tidak tahu dengan pasti apa yang akan berlaku ke atas hidup kita meskipun hanya sesaat masa yang Tuhan berikan. Jadi setiap detik yang ada dalam hidup kita merupakan satu anugerah yang tak terkatakan...fikirkanlah....

Paong Je Tiga

Nta majan kado' naan de kelo' ke mesak senganak. Uko' kise' gaban ji de' bua' nading ke tai mesak. Medan mesak kado' du oba' ke oman e. Midan le oman bua' ji jane ne ilu tisen samada bua ji mey, mesem, lonek , milung ngan kado' naan de ilu tisen.

Kua' baan gaya' kise' udip tepat panak cin ading de, kua' layan kise' bua' ji ne senganak. Tepat lepa ngena boan ketai mesak ngan sokat ilu oman bua' e. Layan udip telu panak de mudip ke daley Belaga, Tatau ngan ke Asap Koyan kado' de tepat lepa lapa ngan taan keneng paong bua' je tepat mile' kena ki re. Puun bua' ja telu mile' ngan ngena boan ke mesak lepa telu taan. Cin koda-koda' oman je lepa lapa re kado' ne paong/puun bua' de du nai pelaku me telu panak. Mencam dau kenai du bada' me telu ngan beng tiga ne dau paong da baan du lote. Un tepoo, masa tetap ke pelua' kise' samada paong bua' je telu panak mile' tiga atau nta. Lepa koda'-koda' puun/ paong bua' lepa ilu panak mile' cin ading de ngan dalem puun bua' ja ilu mile' un bua' ja pekenaan le. Un pe daan de opa...Nape ca puun tapi daan ngan boan bua' nta kua'.

Inan bua' anun du kena ji re. Ilu oman boan cin puun anun du. Na' pe kumin teka' kimet enta oba' ke oman bua' ilu terpaksalah oman cin puun anun du ji. Mesem, mey pait, milung , boken ngan madam ilu terpaksa terima' mung da. Ilu oman cin puun anun du senganak.. Kumin boka ilu ngen mita paong ngan paong ja anun le tengen basa' ke tiga tain? Pekimet tiga le senganak mung...Lepa majan ne tepat oman cin paong anun du kena ji re. Paong anun telu tengen un ne de cukup tiga tain? Gred koda paong anun telu? Boka ilu koma paong anun telu tiga mile' paong anun telu panak tengen..boka oba' paong anun du ....pekimet tiga le.

Ngepali Osa ngan Berua

Senganak mung nengayet ngepali osa ngan berua le singket-singket batang osa. Kado' naan pengeten de nai pedaru kimet le. Kado' naan isu ngan gaya kelunan de nai petaba kimet. Beng dau le petangen ilu mung nengayet ne ngan ayen lua' pubut penisen ngan pesentey pala' Amai Bio' mung naan de ilu nyeripa...

PEKIMET NGAN MILE' NGAN TENENG

Dalem udip le kelunan cin tading Tuhan oyan tepun le kelunan(Adam) senaa' ilu kelunan lepa mile'. Pabe' naki ne ilu un "kebebasan" ke mile' iyu de ilu oba' ngan nta oba' dalem udip ji. Oban ilu kelunan Tuhan oyan un pengencam/penisen/kimet ja' lemotat ke pisu dalem tawai le apan le mile' ngan tiga/teneng.

Dalau le mile'-mile' pemoyan de un dalem udip ji, un pe pemoyan de du nai nyerata'/miai te tena ilu apan le mile' baya' kimet kelunan de nai petaba kimet le. Udip mading ngan maju ji odai ketu' naan pemoyan de kelunan nai engkin te tena mata/pak/telinga le apan ke mile' ngan pebetep ca poyan bio' dalem udip ji uku' baan selawan keyta ca leliwa re. Kado' naan "warna" de ida engkin te tena ilu.... Dalau udip le ke daya songai senaa' nta un kado' naan dau isu de du nai engkin kata du ke peseluk kimet ngan tawai le. Naki odai''haa.....

Senganak....kena du ke mile'-mile'....ngan ilu pe ke mile'-mile'....petwai ne ngan pekimet ngan penisen. Ayen baya' kimet osa lema' ji....Baya' ne penisen ja' sokat ke engkin ilu mudip ngan tiga baya' te......Iut atau bio' ja ilu ke mile', senganak mile' ne man kimet ja' teneng......

Selamat Oman Mading 2011

Ngebangen kimet ngan ngepali berua apan sokat masat ngan tiga dalem oman mading ji. Kelo' ke ti selamat oman mading me telu mung....Nape ilu nta sokat peman palat ujo' talan arap Tuhan pemung ngan le lemotat na' peniga dalem udip telu panak mung....

Lepuun

Majan lan ne du oyan Empeng Diam Bakun. Koda' oman ne ji odai ku?...Ilu de mudip ke daley Belaga naki tiga ne ngebaya' tai naat kise' lepuun tepat de ke daya Empeng Bio' ji. Oban ilu mung pe tisen nta majan laa tana' de kedaya empeng te du ke pelempam.Mung peniga taat mata ke salai ngan lenja ke dalem songai.

Un lote' mutu keneng senganak tepat de tai ngebaya' naat lepuun ke Long Geng te. Ngan ake' pe bien naat kise' oban Video de ida ala'. Atek bimpin ale' le taan ngan selawan ale'-ale' kise' lepuun le ke ia te. Anak telu de baya' ne kado' nta tai taan lepuun tepat da bane'. Oban pengudip ja ' maju kado' ja ilu terpaksa bayan kidi oban lepuun le de ilu lepa nganun cen senaa' ketai salai te tena mata.

Mudung, bai tiga ngan tana' leka' le ketai lenja ngan anun atuk ngan kerabang atau anun peke naan le cen de un ke dalem songai ne ja oo. Ilu na' tua'(percuma) mida. Ida nta perlu mencam nyorat ke isi borang nyat tana' tepat da ngan ilu na' mida tua'.

Senganak, ketai udip ji paliu lote ji ngan ilu mung terima pemoyan ji ngan kimet je baat? Bangen? Atau mia tain? Tosa pekimet ji oban beng dau tekuang asu ne taan ketai bai ngan tana' le da ke lempam keji oo. Seau...seau....pe ilu ku........

Mesau Lanap Yap Cin Buan Kiing

Majan lan ne ilu ngimet udip ja lebih tiga, sengela ngan ngkin lento ja' bio'. Ilu mung pe tisen nta un kelonan de mudip ke usun tana' ji nta oba' mudip lento lemoto. Nta kira kelunan de ilu koma alu" atau ilu de mudip nganan daley mung ilu kelo' ke lento mudip. Lento mudip dalem penakau ngan ngkin ilu pekedung ke peniga.

Boka ilu nyepule' naat kise' asat tepat de du koma Kenyah(Badeng, Lepo' Tau, Lepo' Tepu, ngan meka pe koda'-koda naan tat ngan asi tepat....)atek perlu tepat naat pemoyan ji ngan dalem. Oban iyu ilu de mudip naki ne ayen nyapau-nyapau teka' naat udip ji ngan perlu pekaliu ngan masat dalem udip ja' lento. Boka ilu ca' mudip dalem udip ja' ngepeyda'-eda' ngan ilu adang ke tapa pabat peniga ji ngan du. Oban mung ilu kelunan de mudip ke daley ji uko' baan ca iyap takau cin buan de. Boka le nta ngebinga' ketai le tapa ngan silap-silap pe ilu nta un sokat ke un pengekaya' ngan pengelento nape ilu kelonan de du koma nganan daley.

Pekimet ne tepat mung apan tepat masat dalem penakau ngan ayen sala' pekimet ngan masat pabe' kenai du neka' ilu cin buan uko' baan kise' mesau lanap yap cin buan kiing.....

Selamat Tau KEBANA 2010

Senganak mung de ake' mala', nta majan laa tau KEBANA ja' tepat Badeng ngena-ngena kenai abe'. Nui iyu ne tiga tau ja tain..Lepa Kebana oman ca re ilu ngena nai tau Kebana jie oman ji ngan dena' tawai. Singket oman ilu ngena nai tau Kebana ji kua' uko' ngena boan abang ji tain? Ilu ngena tau ji oban bio' sen me tepat de du koma Kenyah Badeng. Kebana ji lepa majan tepat ngeramey ngan kado' pemoyan de tepat ti dalem ramey Kebana ji.

Kise' kelayan ilu ngeramey Kebana ji man "Sukan dan Kebudayaan". Jadi cukup ramey ngan petagey ilu mung dalem main ngan layan udip asen ilu mung. Harap tepat makin tau makin tagey ngan gaya dalem mita peniga dalem mete' tepat Badeng dalem main asen tepat ne. Harap Kebana oman ji ke ngepit/engkin bangen tawai dalem singket batang osa tepat mung...

Maju Kenyah Badeng..

Tetap Ngedengkep Penisen Tepat Kenyah

Senganak mung, minggu je lapa re nai ne pebetep peresa anak-anak telu de ala' peresa SPM & STPM 2009. Boka le naat ke dalem berita kado' ale' lepo' do de ala' Gred A+ dalem mung subjek. Kumin tain? Adi mencam ale'-ale' ne oban du odai? Kumin anak-anak tepat Kenyah de ala' peresa ngan du un de ala' A+ dalem mung naan subjek mu?

Nape meka bio' pe teka' kimet le oban un pe anak/sadin/senganak tepat de lebau peresa di lote. Me de lebau ti bangen tawai ngan me de pubut ayen loap/pook tawai. Ten pe la-a pabe' tai lebau ke peresa em.

Me anak-anak de lepa lebau mita janan man em sokat tai pecuk sekolah ke tak ja mpau laa. Jawai dado' asat sekolah em lepe la-a. Ayen duak-duak teka' pabat penisen pa serutu ngan pekalai pa penuh kuun penisen. Nengayet mita penisen me ilu Kenyah apan un lote dau denga tiga tepat de tai pecuk kua' ngan lepo' du baya' oo.

Pecap Masa Singket Tau

Bua' Nyo Paap

Senganak e' mung...ake' kelo' ke ti selamat pegita ca liwai laa. Kumin lote un magat mu? Un maju mu? Un sio nai singket-singket tau mu? Nta koda lepa moo ne bulan 1 Oman 2010 ji. Kado' pemuyan de ilu taan, ngening, ngan lapa..... Nading bulan ca ji tua' le kado' ne senganak alai layan telu de tai mecin ilu panak mung....Nta le sokat nyekang pengelo' Amai Bio'.

Kado' poyan de pedaram ilu ngan meka lote de petiga kimet le. Senganak....pesentey ne kimet tepa pala' Amai Bio' je man pengudip ngan laset le mung. Adang mung de un penading un lote ketai kebaya' e ...

Selamat Tau Krismas

Nta koda'-koda' kenai Krismas 2009 ji nyeng ne ji. Kado' naan kise' cara kelonan de ilu koma Kristen nyelama kenai Tau X'mas. Harap telu mung magat pabe' tau bio' je kenai ji. Me senganak de sokat tai ule' ke oma' dado' te arap sokat abe' ngan selamat. Ca liwai laa kelo' ti Selamat Tau Krismas me mung de ngeramey e.....

Ngkin Anak Neliling Lepo'

Midan le baca akhbar tuwi(20/11/2009), atek kado' kelonan de bangen tawai oban anak de sokat capai keputusan tiga dalem peresa UPSR 2009. Un de ngkin anak anak neliling lepo' bada' me kelonan kado' anak de lebau peresa ngan tiga ale'-ale'......Kumin santet tepat Kenyah un anak tepat de ala' 5A mu? Anak-anak du de ke pasen bio' ne kado' ale' de ala' 5A. Arap-arap un anak telu de sokat ala' keputusan ja' cemerlang dalem UPSR je lapa re. Ake' ti tahniah ngan terus berjaya me anak-anak telu de lebau ngan tiga .....terus maju...

Ngemesap Maap

maap kati ngan juit yap

Belian Sio' Majau(Song for The Harvest)

Adoi iyoi awang diman
Dioi awang langit anjan
Ioi awang kolong ngan le balan
Ti pela'a nyalau iyan
Pela nyalau mira tau le maran
Ti pela nayalau pa mujun banan
Lang la bali kera awang diman
Engkey bali pit ngan
Bali pit kayang tumit kemiran
Koda' pe iko' mase ake' lesau sian
Iko' mejung lojong da'au bitan
Mejung kempau kelumbit mali da ngang kuman
Iko' mejung te empau batong osa inan
Kua' teka' tadang buna apui jupan
Teka' ladang kuun paang tau leran
Me nai lingai Sinan
Nai pata tusun aba nyarong buan
Tau ini bali diman
No pai' pa kumin oban
Kenai ladang kuun paang tau leran
Kua' teka sup ujan
Sengim kua' lirim bulan
O iko' ngelidung ame' malujong daan batan
Kuda' pe iko' ngening dau tading ke tira' oran
Kuda' pa iko' mase ame' lesau Sian
Ja ne dau e' ke penoyan pubet banan.

Belian Sio' Nugan(Song of The Sowing Time)

The Late Enchuk Ngau(Petuyuk)-Kenyah Badeng

well known and expert in Belian and Teypet Kenyah
original from Long Busang Belaga.

KOI MAKOI TENOI DALAU,
Ini kenai me' nganyi padai nyelong pilau
Nai na ikem mejong ca titiu latong mato jangau
Takut me cut ta'i udut mangang payan
Takut me' berong ke pata latong mato janan
Takut me' tasan ke aso' suan nyaong kempau
Mao' pe alai ilu nganyi padai nyelong pilau
Ini na layan ilu nganyi tugan
Tading tau le ilu ngalong ca bulan
Mudong usun apau
Ilu ngeramey lo' ini nyat asi mengelesan
Ka Tuhan Allah ia memong mata usit tau
Ka Tuhan ia mampin ngut langit pilau
Nyat na ilu jijan ka besolan kalong bakau
Uyan jaley noso tapey nejey niyau
Kenai me' neley lo' ini
Deng tapey nejey niyau
Neley layan lo' ini besolan kalong bakau
Niley put ca kayu tilut pejong kempau
Iko' neley ne layan
Bete' me' te kuje tetok kujau
Bete' mako le ini kua' po panyo' lalau
Bete' mesik lo' ini po tetik ala' labau
Murut likut nawan anau
Likut saleng lo' ini kua' liseng tapangau
KOI MAKOI TENOI DALAU
Ketai tipo na ini luan ato nengau
Tipo kenai me' sele' padai nyelong pilau
Pecuk na telu ka' aba' lo ini asu' ma-a' jangin pilau
Pecuk ka-ang aso' luing mesan kempau
Kiun ketai lu' nganyi padai nyelong pilau
Uban kelo'lo ini nyat jako sigeu ketau
KOI MAKOI TENOI DALAU
Kenai le ngeramey lo' ini nyat asey pengelesau
Ka Tuhan Allah ja' mampin mata usit tau
Ini ketai tepo ne ini luan ato pesa nengau
Tipo le kenai me' o'o sele' padai nyelong pilau
Padai tiga lote pabe' sada pa uban piyau
Padai kenat teliling tuet meput niyau
Napun ping menya lering usun apau
Un ca to tungun ilau kua' idai loo
Kenai me' sele' padai nyelong pilau
Un ca batang tepurau kajeng
Leka' jungang pejung kempau
Kua' idai lo o sele' padai nyelong pilau
Pa pepan lo o laki ampan punan tapan
Tebab dau papenu' lo o leto
Balu punan lu kelo bunyau
Tipo ne ini luan ato pesa nengau
Tipo ne kenai me' sele' padai nyelong pilau
Luyo' luyun ca tabaun ia muat usit tau
Luyo' luyang lo ca temengang nudok sirang lunok sa'u
KOI MAKOI TENOI DALAU

Pengudip Dalem Sungai/ Banget

Senganak ilu Kenyah ne kado' le mudip ke daya sungai te. Ja uko' du koma ilu "Orang Ulu" kuun alo' atau "Up River Peoples" kuun orang Putih senaa' . Ilu Kenyah malai mudip ke daya sungai de mening tiring(senaa' de?)atau ke apau de kado' mudung ngan tana' miang. Dalau e' anak senaa' lebih kurang lebih 35 oman ja' lapa , atek ketu' teka' tading-tading taan banget. Oban cin tading le lua' kusun tana' ji ilu malai taan sungai iut tua'. Banget bio' tepa taat le mita penyada e ngan laa lait nta kua' ngan sungai le ja' jeling.

Kado' naan cen de mudip, nyatung ngan ngamang dalem banget ngan dalem sungai. Cen de mudip dalem banget nta sokat mudip ke sungai jeling oban malai oman usen/lait tain? Nape ilu kelonan mudip ke empau oba' pe ilu tai neset ngan naat kise' gaya' cen ngan senganak le de Amai Bio' oyan mudip dalem banget/sungai. Midan le taan kise' mung pengepoyan di atek maren ale' lote oban Amai Peselong Luan. Sokat oyan de kata kimet le ketu' ale'-ale'.

Isu Hari Kiamat Tahun 2012/ Kebaya' Pengudip Ke Usun Tana' 2012

Usun Tana'

Kiamat merupakan akhir dari kehidupan di dunia dan tidak akan ada lagi kehidupan di Bumi ini. Berbagai isu kiamat telah banyak didengar selama ini. Akan tetapi, semuanya tidak benar. Seperti juga isu kiamat 080808 beberapa tahun lalu. Kiamat yang terbaru ialah pada tahun 2012. Adakah ia akan terjadi?

Ramalan-ramalan yang mengatakan pada 21 Desember 2012 akan terjadinya kiamat:
Dalam buku ‘Apocalypse 2012’ (Lawrence E.Joseph: 2007), penulis berdarah Lebanon yang menjawat jawatan sebagai Ketua Dewan Direksi Aerospace Consulting Corporation di New Mexico ini memaparkan dengan sangat jelas dan juga ilmiah tentang kemungkinan terjadinya bencana alam pada tahun tersebut.

Fisikawan UC Berkeley menyatakan dinosaur serta spesies lainnya telah punah akibat tumbukan asteroid raksasa 65 juta tahun yang lau. Menurut siklus yang diperhitungkan secara ilmiah, seharusnya hal itu sudah terjadi lagi di saat-saat sekarang. Supervulkan Yellowstone yang memiliki siklus letusan dahsyat setiap 600 hingga 700 ribu tahun tengah bersiap untuk meletus semula. Beberapa perkiraan/ramalan ilmiah lainnya turut menyokong pandangan ini.

Kalender bangsa Maya (Mesir Kuno) dengan detail mengungkapkan tahun 2012 merupakan akhir semua yang ada tetapi permulaan zaman baru. Umpama kelahiran seorang bayi atau anak manusia, maka kelahiran zaman baru ini akan dipenuhi dengan darah. Suku Maya merupakan salah satu suku kuno di dunia ini yang terkenal sebagai suku yang sangat detail memperhatikan dan menghitung bintang-bintang dan ciptaan lain yang ada di langit.

Kitab kuno dari China – I Ching, juga menyatakan akan terjadi bencana besar di tahun 2012. Tokoh spiritual Yahudi dunia bernama Titzchak Qadduri mengatakan; menurut perkiraannya, sebuah komet atau asteroid raksasa sedang meluncur di alam semesta menuju dan akan menghentam tepat daratan Amerika.

Apakah ini suatu petanda atau bukti bahawa tahun 2012 memang benar-benar hari kiamat? Hanya DIA yang tahu dan kita sebagai manusia biasa hanya mampu berserah kepadaNYA. Akan tetapi, semua ramalan itu sebenarnya tidak boleh dipercaya secara pasti.Terdapat banyak ramalan yang telah didengar tentang hari kiamat dari dahulu hinggalah sekarang ini.

Jika dilihat ramalan dan fakta di atas, mungkin kita akan percaya bahawa kiamat 2012 akan terjadi. Apakah pandangan anda tentang desas desus kiamat 2012?......Fikirkanlah….Maan dau ja senganak....

Kimet Ja' No.1/Minda Kelas Pertama

Trafalgar Square, London

Senganak-senganak ja ake' mala' ngan de poto nai naat lasan e' ji, un ca pemoyan ja' lemoto nai dalem tawai e' jane ke pata kise' layan pengudip telu panak (Kenyah) ngan lepo'/du/kelonan de un Kimet No.1(Minda Kelas Pertama).

Boka le naat kise' kelonan de lepa du koma un minda kelas pertama kua' pe kise' re ngan le. Midan le mesik mata le ngan naat senganak-senganak de un mudip ngan le ke tana' Malaysia/ Sarawak ji saleng pe kise' ulu re ngan lebih kurang pe kise' layan batong osa re ngan tepat Kenyah di. Kumin senganak-senganak tepat de ca di tain un ne ida un mampin Kimet No.1 ji tain? Mata le nta sokat pelesan taan ngan ngetisen sin kimet kelonan.

Pabe' ketai le sebuling teka' pekimet iyu ja' oban engkin kelonan di tai mampin kimet ja' du koma "Kelas Pertama". Basa boka le oba' pekimet ti pa serutu ngan ayen ti pa mesau betoka, un koda-koda' kise' gaya udip kelonan de kata le sokat ke ngetisen ilu kelonan lepa un Kimet No.1 ji. Kumin kise' le ke tisen kimet kelonan di lebih tiga atau lebih maju cin oo tepat tain? Ngan gaya' re pekimet ja' ilu koma ida ke mampin Kimet No.1 dalem usun tana' ji? Pekimet me tepat senganak.

Tiga pe tepat mung pabat pengencam, pekalai tiga ngan liba' kimet ngan jaga' adet ja' selawan. Kelimpun mung peniga ngan penisen pabe' ketai tepat Kenyah ne kua' mencam ngan un Kimet No.1 ji kua' ngan kelonan de lepa maju di. Beb barip.........nengayet tepat......

Pengoman Ilu Kenyah Ja' Bolen Ngan Tiga

Soet de lepa du kelimpun kira Gred A & B tua' le di

Kelimpun/Nemo soet

Tai mesik kep tung dalo apan sokat mepi' batang dalo de lepa un soet

Soet(Sago Worm/Ulat Mulong/Matar) jane ca olet ja' mudip dalem nanga/talang/dalo. Soet oba' mudip dalem batang naga/talang/dalo de du lepa nepeng ngan nyepet boet lebih kurang dalem 1 meter pengedado' e. Sepet batang nanga/talang/dalo ilu mekep man tung kayu atau pe tung nanga apan nta pana ale'. Boka batang nanga sio' tau katan/pana kurang pe so'et de oba' mudip dalem e. Ayen pe aung batang da ke tana' de lua' lempam kuun songai tai jaat pe sin dalem batang ja. Sokat-sokat muang ngan pana kata le pemudip soet.

Asal soet jane cin ca cen je ilu koma tekepiu. Tekepiu jane toa soet. Boka le nepeng nanga nta majan o-o ja tekepiu ji kenai nesek naat ngan nading neylo. Ulet(nta un nawai jadi soet) iut tua' le tading ilu taan ngan lebih kurang 3 bulan ke tenoyan soet. Boka le naat kise' layan osa soet atek domet-domet ke kise' e. Kado' pe du da nta oba' oman soet. Takut/lemiten/kereta' ngan sigut tain? Masing-masing pe oban pengelo' betoka le kelonan. Un pe de datan(alergic) boka re oman soet.

Ake' lepa oman soet atek tiga teka' ti ngan e. Melau-melau ngan do-au teka' ngan boka le nelang keriut laa, ngelit lia sanit ar.....cenaan tiga pe teka' ja senganak. Boka le maap tiga ale- teka' bao' paap soet ngan cenaan do-au. Kumin tain? Iyu peniga ja' ilu ala' boka oman soet? Tiga lote bane' oban beng tai magat ko-o pe teka' le lepa le oman soet.

Senganak boka tai ule' ke oma' ngan un kata em pebio'/pudip soet tiga ale' pe ti poyan ja. Harga ca osa soet de bio' de du pebeli ke pasen kojau jane 40 sen. Boka le sokat pudip kado' soet, ji pe ca janan man le mita ligit. Lepa ji oo tai ne mita kata pudip soet....

Puun Ale'-Ale' ngan Mading Ale'-Ale'.

Wat Phra That Doi Suthep,Chiangmai,Thailand, Jan 2009.Pengepuun mato oman.

Vhat Phu, LAOS. Jan, 2009. Du nading oyan ji abad ke-5 M.

Ji kise' "Tower of LONDON" ake' ala gambar April ,2009, oma' puun ji lebih 1000 oman.

Nara, Japan. Sept, 2009. 700 M

Boka le naat kise' puun(julung) tira' ji jane un dua pemoyan de ilu kelo' ke ngetisen ngan naat. Dua pemoyan da jane PUUN(lama/antik/ senaa/majan?) ngan MADING. Kado' kelonan de oba' de puun ngan meka pe nta pe korang kelunan de oba' de mading lote. Dalem udip le kelunan ne, kado' tat/asi(cabang/bidang) dalem pengudip le uko' baan kise' oma', ompat/inu, daley/tana' ngan pemoyan de ilu taan atau te ilu nta sokat taan pe tetap un dua pemoyan di jane ja' PUUN ngan MADING.

Dalem pengudip le ke usun tana' ji keji, tai kua' penting ne kise' dua pemoyan di keji. Boka le naat laku ale' pe kise' de mading-mading/mading tiring ngan nta pe korang penting kise' de puun pe. Dua pemoyan di atek un sen e dalem pengudip le kelunan.

Boka le naat dalem kise' pengudip le Kenyah de mudip ke usun tana' ji keji kumin un de ilu ca' pambin pabe' tau i ja PUUN ale' tain? Boka re nta puun basa' MADING tiring? Kumin kise' le ke koma ca pemoyan ja puun atau mading? Ilu naat kise' pengemajan ca pemoyan ja un nai lua' ke usun tana ji.

Lebo tua pekimet ji senganak, kumin un ompat puun tepat ja' ca un keneng ilu pabe' tau i ja empau ale'-ale' lega ? Atau iyu de mading tiring ja ilu koma dau beng ame' pat Kenyah tua' le de un atau oyan ji keji. Un sepo-o, ke mita pemoyan de puun ngan mading tiring de ilu koma anun le pe tosa tau ji bane'.

Ke usun tana' ji keji, kecet teka' le oban lepo'(negara-negara) de maju ale'-ale' di un mambin kadu ale' de PUUN ALE'-ALE' ngan meka pe de MADING ALE'-ALE' lebih kado' cin o-o anun le tain?Tiga tepat pekimet poyan ji. Ake' na' koda-koda gaban de ake' lepa tai naat.