Pecap Masa Singket Tau

Bua' Nyo Paap

Senganak e' mung...ake' kelo' ke ti selamat pegita ca liwai laa. Kumin lote un magat mu? Un maju mu? Un sio nai singket-singket tau mu? Nta koda lepa moo ne bulan 1 Oman 2010 ji. Kado' pemuyan de ilu taan, ngening, ngan lapa..... Nading bulan ca ji tua' le kado' ne senganak alai layan telu de tai mecin ilu panak mung....Nta le sokat nyekang pengelo' Amai Bio'.

Kado' poyan de pedaram ilu ngan meka lote de petiga kimet le. Senganak....pesentey ne kimet tepa pala' Amai Bio' je man pengudip ngan laset le mung. Adang mung de un penading un lote ketai kebaya' e ...

Selamat Tau Krismas

Nta koda'-koda' kenai Krismas 2009 ji nyeng ne ji. Kado' naan kise' cara kelonan de ilu koma Kristen nyelama kenai Tau X'mas. Harap telu mung magat pabe' tau bio' je kenai ji. Me senganak de sokat tai ule' ke oma' dado' te arap sokat abe' ngan selamat. Ca liwai laa kelo' ti Selamat Tau Krismas me mung de ngeramey e.....

Ngkin Anak Neliling Lepo'

Midan le baca akhbar tuwi(20/11/2009), atek kado' kelonan de bangen tawai oban anak de sokat capai keputusan tiga dalem peresa UPSR 2009. Un de ngkin anak anak neliling lepo' bada' me kelonan kado' anak de lebau peresa ngan tiga ale'-ale'......Kumin santet tepat Kenyah un anak tepat de ala' 5A mu? Anak-anak du de ke pasen bio' ne kado' ale' de ala' 5A. Arap-arap un anak telu de sokat ala' keputusan ja' cemerlang dalem UPSR je lapa re. Ake' ti tahniah ngan terus berjaya me anak-anak telu de lebau ngan tiga .....terus maju...

Ngemesap Maap

maap kati ngan juit yap

Belian Sio' Majau(Song for The Harvest)

Adoi iyoi awang diman
Dioi awang langit anjan
Ioi awang kolong ngan le balan
Ti pela'a nyalau iyan
Pela nyalau mira tau le maran
Ti pela nayalau pa mujun banan
Lang la bali kera awang diman
Engkey bali pit ngan
Bali pit kayang tumit kemiran
Koda' pe iko' mase ake' lesau sian
Iko' mejung lojong da'au bitan
Mejung kempau kelumbit mali da ngang kuman
Iko' mejung te empau batong osa inan
Kua' teka' tadang buna apui jupan
Teka' ladang kuun paang tau leran
Me nai lingai Sinan
Nai pata tusun aba nyarong buan
Tau ini bali diman
No pai' pa kumin oban
Kenai ladang kuun paang tau leran
Kua' teka sup ujan
Sengim kua' lirim bulan
O iko' ngelidung ame' malujong daan batan
Kuda' pe iko' ngening dau tading ke tira' oran
Kuda' pa iko' mase ame' lesau Sian
Ja ne dau e' ke penoyan pubet banan.

Belian Sio' Nugan(Song of The Sowing Time)

The Late Enchuk Ngau(Petuyuk)-Kenyah Badeng

well known and expert in Belian and Teypet Kenyah
original from Long Busang Belaga.

KOI MAKOI TENOI DALAU,
Ini kenai me' nganyi padai nyelong pilau
Nai na ikem mejong ca titiu latong mato jangau
Takut me cut ta'i udut mangang payan
Takut me' berong ke pata latong mato janan
Takut me' tasan ke aso' suan nyaong kempau
Mao' pe alai ilu nganyi padai nyelong pilau
Ini na layan ilu nganyi tugan
Tading tau le ilu ngalong ca bulan
Mudong usun apau
Ilu ngeramey lo' ini nyat asi mengelesan
Ka Tuhan Allah ia memong mata usit tau
Ka Tuhan ia mampin ngut langit pilau
Nyat na ilu jijan ka besolan kalong bakau
Uyan jaley noso tapey nejey niyau
Kenai me' neley lo' ini
Deng tapey nejey niyau
Neley layan lo' ini besolan kalong bakau
Niley put ca kayu tilut pejong kempau
Iko' neley ne layan
Bete' me' te kuje tetok kujau
Bete' mako le ini kua' po panyo' lalau
Bete' mesik lo' ini po tetik ala' labau
Murut likut nawan anau
Likut saleng lo' ini kua' liseng tapangau
KOI MAKOI TENOI DALAU
Ketai tipo na ini luan ato nengau
Tipo kenai me' sele' padai nyelong pilau
Pecuk na telu ka' aba' lo ini asu' ma-a' jangin pilau
Pecuk ka-ang aso' luing mesan kempau
Kiun ketai lu' nganyi padai nyelong pilau
Uban kelo'lo ini nyat jako sigeu ketau
KOI MAKOI TENOI DALAU
Kenai le ngeramey lo' ini nyat asey pengelesau
Ka Tuhan Allah ja' mampin mata usit tau
Ini ketai tepo ne ini luan ato pesa nengau
Tipo le kenai me' o'o sele' padai nyelong pilau
Padai tiga lote pabe' sada pa uban piyau
Padai kenat teliling tuet meput niyau
Napun ping menya lering usun apau
Un ca to tungun ilau kua' idai loo
Kenai me' sele' padai nyelong pilau
Un ca batang tepurau kajeng
Leka' jungang pejung kempau
Kua' idai lo o sele' padai nyelong pilau
Pa pepan lo o laki ampan punan tapan
Tebab dau papenu' lo o leto
Balu punan lu kelo bunyau
Tipo ne ini luan ato pesa nengau
Tipo ne kenai me' sele' padai nyelong pilau
Luyo' luyun ca tabaun ia muat usit tau
Luyo' luyang lo ca temengang nudok sirang lunok sa'u
KOI MAKOI TENOI DALAU

Pengudip Dalem Sungai/ Banget

Senganak ilu Kenyah ne kado' le mudip ke daya sungai te. Ja uko' du koma ilu "Orang Ulu" kuun alo' atau "Up River Peoples" kuun orang Putih senaa' . Ilu Kenyah malai mudip ke daya sungai de mening tiring(senaa' de?)atau ke apau de kado' mudung ngan tana' miang. Dalau e' anak senaa' lebih kurang lebih 35 oman ja' lapa , atek ketu' teka' tading-tading taan banget. Oban cin tading le lua' kusun tana' ji ilu malai taan sungai iut tua'. Banget bio' tepa taat le mita penyada e ngan laa lait nta kua' ngan sungai le ja' jeling.

Kado' naan cen de mudip, nyatung ngan ngamang dalem banget ngan dalem sungai. Cen de mudip dalem banget nta sokat mudip ke sungai jeling oban malai oman usen/lait tain? Nape ilu kelonan mudip ke empau oba' pe ilu tai neset ngan naat kise' gaya' cen ngan senganak le de Amai Bio' oyan mudip dalem banget/sungai. Midan le taan kise' mung pengepoyan di atek maren ale' lote oban Amai Peselong Luan. Sokat oyan de kata kimet le ketu' ale'-ale'.